近日一家机构推出《中国女市长魅力榜》,对国内96位女市长按学历、职称、年龄、照片以及服饰打扮等内容进行评估,并排定座次。个排行榜一公布,就畀社会各方丧插,认为噉做助长咗官场作骚嘅歪风。
首先,评选有先天不足。呢啲评选内容多嚟自网络,又冇实地考证,冇说服力。好似学历噉啊,点知系点得嚟口架。系寒窗苦读噉捱出嚟,定系用其他方法整返嚟。若果唔系靠勤力用功但又搞到个高学历,噉佢有嘅系魅力定系“能力”呢?另外服饰打扮,究竟着国际名牌有魅力,定系着街边货有魅力?如果一位女市长拎住个绝版LV手袋,着住套Prada套装,成身喷满Chanel嘅香水,去到贫困地区访贫问苦,同嗰啲面黄肌瘦、打大赤脚嘅农村细路合影,噉系咪就好有魅力呢……
其实,女市长(应该话系所有公仆)嘅魅力,好显然在于佢有冇为人民鞠躬尽瘁,有冇为民生疾苦劳碌奔波；同时喺面对邪恶嗰阵一身正气,即使手握大权仍廉洁自律。好似前任副总理吴仪,为国家利益操劳大半生,在其位则一往无前,不在其位亦绝不拖泥带水,恋栈权力。佢获得多方好评,被很多人誉为中国最美丽嘅女子。呢啲先系魅力啊嘛!
作为官员,其最大嘅魅力嚟自真实嘅政绩,嚟自大众嘅认可。呢啲以所谓嘅魅力榜代替实干,以流泪代替决策、以访贫代替扶贫等作骚风气系唔可取嘅。试想吓,如果啲公仆为个学历、职称打崩头噉搞张砂纸,想张照片好睇啲,年龄冇咁大就净系挂住美容化妆,或者成日谂住啲国际名牌,服饰搭配；噉边有时间同精力去为人民服务呢?魅力系靠脚踏实地做出来嘅,要入大众心中嘅魅力榜,落力为民做嘢会更好!（Pippo阮）
